“O colapso sanitario non se resolve coas desculpas do presidente”

"Os recortes sanitarios e a paralización do Plan de Mellora de Atención Primaria. Eses son unha das principais causas do colapso que está a sufrir nas últimas semanas a sanidade pública. Así o denuncia a o Sindicato Sanitarios Galegos Públicos ( SAGAP ) que di que a actual situación “non se trata dun simple adianto do pico de gripe, como os nosos dirixentes queren facer ver á sociedade”.

Así, destaca que o “problema real” deriva, no fondo, da política de recortes sanitarios da Xunta de Galicia. “A redución do gasto sanitario vese reflectida ao longo de todo o ano nunha considerable redución de persoal e contratación de persoal, o peche de camas e de unidades, escaseza e diminución notoria da calidade de recursos materiais (faltan padiolas, agullas, roupa... ), o desabastecemento das farmacias hospitalarias, e moitas outras”, apuntan nun comunicado.

Por iso, quere deixar claro que esta “situación especial” nada ten que ver con imprevisible. “Todo o mundo é capaz de relacionar frío e inverno con problemas respiratorios e gripes, repetíndose ano tras ano”, engade.

Outra das cuestións que denuncian desde a SAGAP é a paralización do Plan Mellora de Atención Primaria que, di, repercute tanto na prevención como no correcto seguimento e control dos pacientes para evitar a súa chegada ao sistema hospitalario.

“A todo isto debemos sumar outros factores como o envellecemento da nosa poboación, con necesidades de saúde aumentadas, o recorte nas axudas á dependencia, o copago sanitario e a diminución da capacidade económica das súas pensións que fai que, moitas veces abandonen os seus tratamentos, e por tanto debiliten aínda máis a súa saúde”, engade.

Por iso, insiste, que o colapso sanitario é “estrutural”, que pouco ten que ver coa gripe, e que non se resolve “coas simples desculpas do presidente de quenda”. “Son desculpas que de pouco valen aos profesionais que día a día, minuto a minuto, déixanse a pel no seu traballo, tratando de facer menos visible esta situación de caos insustentable e indefendible e en pouco reconfortan aos pacientes e familiares”, di ao tempo que esixe unha “xestión eficaz e eficiente” dos recursos públicos."               (Galicia Confidencial, 13/01/2015)