Carolina Bescansa volve á política e encabezará a lista de Más País pola Coruña

"Desde a súa marcha de Podemos sempre mostrou o seu apoio a Errejón. Di que dá o paso "coa vontade de evitar a abstención" e defende chegar a pactos co PSOE.

"Dou este paso coa vontade de evitar, na medida das miñas posibilidades, que a abstención termine coas posibilidades de escribir un novo futuro para o meu país", declarou no seu perfil de Twitter para despois asegurar que "é unha honra liderar a candidatura da Coruña".

"Experiencia, mesura, espírito construtivo, experta socióloga, gran coñecedora da sociedade española, talante, escoita e moderación. Son as cualidades que vemos nela", destacaron as mesmas fontes sobre a súa fichaxe.

Bescansa, que se distanciou do secretario xeral, Pablo Iglesias, na Asemblea de Vistalegre II de hai dous anos, tratou de plantar cara á dirección tanto nas primarias da Comunidade de Madrid, nas que saíu elixido como candidato Errejón, como nas de Galicia. En ambos os casos, non conseguiu o seu obxectivo.

Desde a súa marcha do partido morado, Bescansa sempre mostrou o seu apoio a Errejón, en especial cando este decidiu abandonar o seu escano como deputado no Congreso. "Iñigo Errejón deixou o seu escano. Ao meu xuízo, é un gran erro e un síntoma máis da deriva que, tristemente, tomou a nosa organización", dixo entón.

Pouco despois, cando Errejón deu o salto á Comunidade de Madrid coa plataforma Más Madrid, ofrecéuselle a posibilidade de ser a 'número dous' da súa lista. Entón, Bescansa rexeitou a oferta para non prexudicar á formación morada.

Desde a súa marcha da política, Bescansa, que é doutora en Ciencia Política e Socioloxía, integrou a comisión de expertos creada polo Centro de Investigacións Sociolóxicas para estudar melloras na 'cociña' das enquisas electorais. Ademais, imparte a materia Métodos e técnicas de investigación en ciencia política na Universidade Complutense.

A incorporación dunha das fundadoras de Podemos chega despois de que Más País anunciase onte que a senadora de Adelante Andalucía Esperanza Gómez sería a cabeza de lista da formación por Sevilla para os comicios do próximo 10 de novembro.

PACTOS

Bescansa defende que a formación chegue a un acordo co PSOE de Pedro Sánchez tras os comicios do próximo 10 de novembro.

Na primeira entrevista concedida a un medio tras coñecerse que regresa á política, Bescansa aclarou que Más País non é un proxecto "que naza para enfrontarse a Podemos, senón a unha situación de parálise".

En declaracións á Cadena SER, explicou que foi o líder de Más País, Íñigo Errejón, o que lle ofreceu encabezar a lista do partido pola Coruña.

"Este proxecto nace da excepcionalidade dunha situación realmente grave. Reincorporeime á facultade e isto, en termos biográficos, non é algo que estivese previsto", apuntou Bescansa para xustificar a súa volta á primeira liña.

Así mesmo, a socióloga explicou que outra das razóns polas que aceptou a oferta de Errejón é a falta de acordo entre PSOE e Unidas Podemos que levou á repetición electoral. "Ten que haber ese acordo. O que parece inexplicable é que non o houbo", defendeu tras ser preguntada sobre un posible pacto cos socialistas."                 (Galicia Confidencial, 04/10/19)