Pescanova: "Hoxe vendemos 350.000€ en accións. É difícil vender por falta de liquidez"

* Unha decena de empresas opacas para evadir impostos e manexar a capricho a autocarteira.

  Entre os dez conselleiros e altos cargos de Pescanova imputados nunha primeira tacada polo xuíz Ruz non ten o dubidoso honor de figurar Alfonso García Calvo, un importante testaferro de MF, que fora administrador de Novapesca e apoderado de Pescanova, o seu enlace de confianza cun grupo de empresas secretas, domiciliadas en paraísos fiscais.

Digámolo axiña: durante décadas MF ten empresas ocultas en Madeira, Panamá, USA, IIlas do Canal, Malta, Uruguai e Illas Virxes, entre outros paraísos, para defraudar impostos á súa querida patria, empresas cuxa mera existencia desmente e bota por terra calquera coartada moral de MF como valedor do idioma galego, da cultura, mecenas artístico, Galego do Ano, empresario do mes e emprendedor do século. 

Ademais de todo o que imos sabendo, a simple aparición destas contas opacas en paraísos fiscais contamina a todas as amizades perigosas, especialmente aos políticos máis próximos a el, que durante anos comeron na man de MF e lle deron de comer. Igual que Jack o Destripador, revelouse como un asasino en serie nas noites de Londres, MF foi durante vinte anos un defraudador de impostos en serie.

A evidencia dixital atopada polos forenses nesta autopsia remóntase polo menos ao ano 2001. No ordenador de García Calvo, no cartafol de “elementos eliminados”, hai que ser torpe, os investigadores xudiciais atoparon unha folla de cálculo co título Accio0401 na que consta o diagrama dun novo pool de empresas ocultas, o Grupo Agrofood. A diferenza das tramas anteriores, relacionadas directa ou indirectamente co Holding Pescanova aos efectos de virar facturas falsas e liñas de crédito imaxinarias, no caso de Agrofood non hai ningunha conexión co holding, salvo o fío condutor de Alfonso García Calvo e todos os seus pasos aprobados por escrito por MF.

De novo temos que agraciar aos lectores cuns cantos nomes enxeñosos, a propósito do cansino de tan longa listaxe de sociedades mercantís –que non empresas, desde logo-, pero a inventiva non é nosa, senón de MF. Estas son as sete magníficas das que MF se valeu para hospedar o seu diñeiro en paraísos fiscais:

Agrofood Corporation, domicilio social en Delaware (USA), apoderado solidario, Alfonso García Calvo [AGC].

Worshipful, domicilio en Madeira; apoderado AGC, participada por Pitow Holdings Ltd. (sé en Malta?) e Nielton S.A. (sede en Uruguay). Pitow e Nielton eran fiduciarias de Eurofisheries Trading.

In hoc Tempore, igual que Worshipful, domicilio en Madeira, etc. As mencionadas Pitow e Nielton eran á súa vez fiduciarias de Eurofisheries Trading:

Eurofisheries Trading Ltd., operaba desde Xersei con domicilio social en Illas do Canal; participada ao 99,9% por Agrofood e, ollo ao dato, 0,00003% de Pescanova S.A., sendo director AGC e apoderados mancomunados e solidarios o propio Alfonso e Luis Mediero Cabiedes, tamén empregado de Pescanova.

Rio Piles S.A., operaba desde Chile con esquema similar á anterior; participada por Eurofisheries co 99,9% e o resto a nome de Víctor Tarigo Bonizzoni, presidente de Pescanova en Sudamérica.

Sarpesca, tamén en Chile e á súa vez formada pola anterior, Rio Piles (55%) e por Pescachile (45%), pero alleas ao holding propiamente dito.

Frozen World Wide, domicilio en Panamá, socio único Eurofisheries Trading, apoderados catro directivos de Pescanova en Sudamérica: Enrique Pereira, Alberto de Angelis, Pelayo Arocena e o mencionado Víctor Tarigo.

A operativa fiduciaria asentada en todos estes testaferros de confianza é anterior a 2001, ano no que se documenta a compra en Madeira de Worshipful, cabeceira do Grupo Agrofood:

Manuel: recibín informe de Madeira. Parece ser que as sociedades rexistradas en 1999 non pagan impostos e as do 2000 tampouco, aínda que a Comisión Europea iniciou un procedemento contra Portugal xa que pretende que desde ese ano 2000 xa se paguen. Isto é así xa que a partir do ano 2001 hai un imposto de 1% subindo cada ano ata o 2011 en que desaparece o estatus especial de Madeira.

Tal como comentamos, vou comprar unha sociedade chamada WORSHIPFUL-COMERCIO INTERNACIONAL E SERVISOS, LDA. (Máis adiante pode cambiarse o nome). Esta sociedade será oficialmente propiedade duns socios postos polo noso administrador cun contrato de fiducia en favor de Eurofisheries. O director poñerano eles (aínda que eu terei un poder para usar en caso excepcional) e el abrirá unha conta corrente en Banco dei Roma que manexarei con ordes que me deixará asinadas en branco, de tal xeito que eu non figure.

[Mail de Alfonso García Calvo a MF o 7 de febreiro de 2001]

A ver se o entendemos ben: desde Chapela, contemplando as illas Cíes e no horizonte, mar por medio, Nova York, García Calvo e Sousa entretéñense en crear unha sociedade en Jersey –Eurofisheries- na que Pescanova posúe o 0,0003%, e aí pérdese o seu rastro, que á súa vez compra, fiducia ou administra outras empresas en Madeira -Worshipful, In hoc Tempore- que á súa vez teñen contas no Banco di Roma, desde as que se fan transferencias asinadas en branco (a onde?, cara ás empresas de Panamá?).

Logo de darlle moitas voltas, non conseguín entender qué relación ten todo isto coa pesca e a comercialización de pescadas e langostinos, coa acuicultura e con ser a quinta marca do mundo mundial e primeira de Chapela. Contaríalle estas cosas don Manuel Fernández a don Manuel Fraga nos seus ágapes preelectorais? Ou mellor aquilo do Evanxeo: que a túa man esquerda non saiba o que fai a túa man dereita.

O mesmo 7 de febreiro, AGC envía outro correo para vender rodaballos á sociedade Madeira Fiducia Management, representada por Bruno Sá Figueira:

Estimado Nuno: 1. A sociedade que vai comprar e coa cal faredes o contrato de fiducia é Eurofisheries Trading, Mulcaster Street, St. Helier, Xersei JE4 8XZ, Channel Islands.

2. O apoderado son eu, AGC, pasaporte 36XXXXXXXA e domicilio en c/ XX, Vigo. A sociedade a comprar é Worshipful.

3. Eu quero traer o martes 13 un poder… etc.

Saúdos, A. García.

No sumario –documento 115 do Informe forensic- consta a vinculación de AGC con tres sociedades ocultas en Panamá -Metco Investments, Mahina Holdings e Magrave Investments-, probablemente destinatarias finais das transferencias, pero nalgún momento o fío pérdese no nobelo, mais, quizais o lector xa ten resposta á nosa pregunta inicial: Onde está o diñeiro?

Ademais de aparcar beneficios e defraudar impostos, a trama Agrofood serve a MF para comprar e vender accións de Pescanova ao seu antollo, secretamente, sen ter que dar contas á CNMV nin aos conselleiros, nin a ninguén. Trataríase de accións de autocarteira (o volume da autocartera estaba en torno ao 5% a finais de 2012), fóra do control dos demais socios. Así, en xaneiro de 2012, o apoderado Luís Mediero, xefe de terceira de Pescanova, escribe a MF con copia a Alfonso:

Bos días, achego datos solicitados:

Worshipful accións: Existencias: 51.836. Custo medio: 58,2

Lafonia accións: Existencias: 331.551. Custo medio: 29,3

Días despois, Alfonso informa a Sousa:

Manuel: coma todos os anos, doulle a Alfredo as representacións de Worshipful e Lafonia para a xunta a favor do presidente.

Sousa responde lacónico, coma sempre: “OK. MF”

Pero, a estas alturas da partida, entre agosto e novembro de 2012, coa crise macerando nas bodegas do barco, estas sociedades empezaban a ser incómodas.

Manuel: De acordo ao que me comentaches tempo atrás, unha vez vendida a carteira do noso valor que tiñamos nesta sociedade [Worshipful, Madeira] creo que podería ser conveniente liquidala. Se estás de acordo póñoo en marcha. AGC

A resposta leva o selo de Corleone:

OK, liquídaa. MF [Mail de Sousa a Calvo o 13-11-12, 10:27 h.]

E tamén Carlos Turci, outro de confianza, o inventor en 2004 da enxeñería triangular e piramidal, do triángulo inscrito na circunferencia financeira, está ao corrente de todo desde o primeiro ata o último día. MF infórmao persoalmente en xaneiro de 2013 das operacións de venda de accións ocultas á CNMV e a todo o mundo:

OK. Hoxe vendemos outros 350.000€ en accións. É difícil vender moito por falta de liquidez. Creo que vendemos un total de 1M€. Quédannos uns 420.000 títulos que son uns 6,5 M€. Mañá intentaremos vender máis. Témolas a un custo de 25€, polo que perdemos case un 50%. (…) tamén me chamou Luís Cabanas para dicirme confidencialmente que o 17 executan aos Barreiras, polo que o 2,5% de accións que teñen en Pescanova sairán á venda durante os 60 días seguintes (están obrigados a vendelas en 60 días). Iso prexudícanos co Equity Swap e as que temos que vender en Lafonia. MF [Mail a Turci, 2 de xaneiro de 2013, 23:14 h.]

Ningunha destas sociedades opacas comprou ou vendeu nunca un rodaballo ou un langostino; en 2012 facía moito tempo que a ocupación principal de Sousa era evadir diñeiro, defraudar impostos, comprar e vender accións ás costas da CNMV e especialmente dos socios. Todos os achegados á famiglia, Turci, García Calvo, Alfredo, Mediero, reportan directamente ao Xefe que toma as decisións últimas persoalmente e, sen inmutarse, ordena: “OK, liquídaa. MF”.

Este libro presentase o luns 28 na Casa do Libro de Vigo (19:30 h.) e o martes 29 na Nave de Vidán en Santiago, á mesma hora, nun acto  que presenta o director de GC, Xurxo Salgado."         (GC publica en exclusiva un avance do libro 'Pescanova Crimen Perfecto', do noso colaborador Valentín Carrera.Galicia Confidencial, 28/10/2013)