Empreamar, exemplo de boas prácticas no emprendemento para a Comisión Europea

"30 persoas desempregadas atoparon no proxecto Empreamar unha perspectiva de futuro e a formación necesaria para converter as súas ideas nun negocio rendible e dinamizador da contorna. 

Por iso, a Comisión Europea seleccionou esta iniciativa de Campus do Mar e o Grupo de Acción Costeira Seo de Fisterra - Ría de Muros e Noia como exemplo de boas prácticas en materia de emprendemento e investimento nas persoas.

Grazas a esta distinción, a única para un proxecto galego, a iniciativa especialmente deseñada para esta zona da costa coruñesa presentarase en sociedade na Sailing towards 2020, a conferencia anual da Rede Europea de Zonas Pesca da Comisión Europea (Farnet). 

Este organismo europeo destaca que Empreamar xera valor social e económico favorecendo os sectores económicos da zona a través do apoio a iniciativas empresariais relacionadas co medio mariño. (...)

O obxectivo é fomentar o emprendemento no eido mariño, poñendo en marcha novas iniciativas empresariais que aproveiten de xeito sustentable a gran cantidade de recursos que ofrece o mar para xerar valor económico e social no ámbito territorial de actuación deste Grupo de Acción Costeira. Con todo, Cristina Quelle non descarta que, de atopar o financiamento preciso, esta iniciativa se poña en marcha noutros GAC, que amosaron o seu interese polo proxecto.

Empreamar arrancou hai xusto un ano con arredor de 30 inscritos dos concellos de Carnota e Porto do Son. Durante os primeiros meses recibiron cursos de formación e titorización da man do Campus do Mar e de expertos de diferentes eidos, así como asesoramento sobre as convocatorias dos grupos de acción costeira. 

Deste xeito os participantes recibiron formación sobre maduración de proxectos, análise de viabilidade, estratexias de comunicación e presentación pública da idea de negocio, posicionamento nas redes sociais, estratexia de marca persoal/profesional e márketing da idea de negocio. Na segunda fase estiveron en contacto directo con emprendedores e empresarios que lles amosaron casos de éxito. 

Esta etapa deu paso á terceira parte do proxecto, que ten como obxectivo converter as súas ideas no xermolo dun negocio. Entre os 30 participantes iniciais, un xurado seleccionou seis iniciativas empresariais, que na actualidade están na fase de preincubación en instalacións de ambos concellos ata que dean o salto definitivo ao mercado. 

Nestes espazos os emprendedores maduran dende hai seis meses o seu proxecto e reciben o asesoramento científico-técnico e de emprendemento que a súa idea de negocio require. Para isto contan, a través do Campus do Mar, co apoio de expertos universitarios nos eidos relacionados con cada unha das empresas para solucionar calquera dúbida que teñan. 

Os seis proxectos que agora están a piques de tornarse realidade son ben dispares. Os inquilinos dos espazos de incubación en Carnota son Alba Quintela, que presentou un proxecto sobre produción e comercialización de camarón; Hanno Gallinger, que traballará no afumado de xarda en Portocubelo e María Carmen Sánchez, que acadou o premio co proxecto Galuriña. Pola súa banda, en Porto do Son traballarán Luis García, que tentará desenvolver un sistema modular de produción e extracción de bivalvo; Verónica Maneiro, promotora de Liémolo palangre, una iniciativa de educación ambiental e Pablo Santos, que centrou o seu proxecto innovador no cultivo de algas.

A Rede Europea de Zonas de Pesca, Farnet, agrupa a todas as zonas de pesca que reciben axudas ao amparo do Eixo 4 do Fondo Europeo de Pesca e o seu núcleo está formando por arredor de 300 grupos de acción local de pesca (FLAG) de 21 países membros.

 A selección de Empreamar como un dos 42 exemplos de proxectos de éxito vén derivada, segundo explica a propia rede, pola coincidencia dos seus obxectivos cos temas prioritarios de Farnet, polos obxectivos acadados e pola transferibilidade. Neste sentido destacan “o desenvolvemento de capacidades ao engadir valor aos produtos pesqueiros e recursos mariños locais, á comercialización alternativa, á creación de emprego é a diversificación deste sector”. 

De feito, agárdase que estas iniciativas emprendedoras poidan xerar 10 novos postos de traballo nesta comarca. Remarcan tamén que estes proxectos destinados a promover as aptitudes emprendedoras e á posta en marcha de iniciativas empresariais axudan a superar os retos aos que se enfrontan moitas zonas pesqueiras de Europa."             (Galicia Confidencial, 06/05/2015)