O PP perdeu un 30% do seu voto urbano galego nas xerais

"Unha parte nada desdeñable da vitoria do PP de Alberto Núñez Feijóo nas eleccións galegas de 2009, así como do 'tsunami' conservador nos comicios municipais e xerais de 2011, tamén en Galicia, tivo a súa base nas cidades.

 Nos seus anos de oposición ao bipartito da Xunta os populares lograran recuperar apoio urbano e atraer sectores que naquela altura puidesen sentirse atraídos por opcións como a de UPyD (...)

Media década despois e tras o devalo nas municipais de maio, as xerais veñen de deixar o PPdeG cunha merma de en torno ao 30% dos votos a respecto dos comicios de catro anos antes.

 Entre as liñas destacadas no argumentario dos de Feijóo tras o 20-D figura que o partido é a forza máis votada en seis das sete urbes do país -en Vigo, o maior número de sufraxios foi para En Marea-. Isto, efectivamente, é certo, como é posible comprobar na gráfica que acompaña esta información. 

No entanto, non o é menos que a formación conservadora non pasou do 36% dos apoios en ningunha cidade e, asemade, en todas elas, con perdas de votos que van dende o 23% de Ourense, onde mellor aguantou, ata o 32,23% de Vigo, cidade na que a caída popular estivo por riba da media das cidades, caso no que se atopan tamén Ferrol e Lugo.

 Paradoxalmente, a cidade galega na que o PP máis caeu a respecto das anteriores xerais, Vigo, foi tamén na que tivo máis votos en termos absolutos e a única na que non é primeira forza. Como no caso vigués, tamén na Coruña os populares experimentan un devalo notable, e dende os comicios xerais de 2011 non volveron superar os 50.000 votos. 

 Nas outras cinco cidades, de menor dimensión poboacional, Ourense segue en cabeza en votos absolutos ao PP, Lugo e Santiago levan traxectorias semellantes e Pontevedra e Ferrol, como en termos de poboación, figuran tamén un chisco por debaixo. En todas elas, a tendencia é descendente.

 Alén das caídas do PP, outra das conclusións que as xerais deixan nas cidades galegas é o asentamento do espazo das mareas como segunda forza e primeira da esquerda -agás Vigo, onde ficou en cabeza, moi por riba da posición lograda pola Marea viguesa nas municipais. 

Onde máis preto do PP quedou En Marea foi na Coruña, onde a diferenza entre ambas formacións foi dunhas 6 décimas e menos de 1.000 votos. Tamén ficaron próximas en Ferrol, a menos de dous puntos. A distancia foi maior en Santiago e máis ampla aínda nas cidades do interior."                  (David Lombao  , Praza Pública, 22/12/15)