O Sergas, condenado a pagar 10.000 euros a un doente que tivo que ir á privada

"O Xulgado Contencioso-Administrativo número 1 de Ourense condenou ao Sergas a indemnizar un paciente con 10.000 euros polos prexuízos padecidos ao ter que acudir á sanidade privada ante as listas de espera do Servizo de Neuroloxía do Complexo Hospitalario Universitario de Ourense (CHUO).

Así confírmao unha sentenza feita pública o 18 de novembro e contra a que non cabe recurso de apelación, na que se indica que a Administración demandada "incorreu neste caso nun funcionamento anormal, incorrecto, deficiente máis alá do tolerable para o servizo público de que se trata".

Os feitos tiveron lugar no ano 2014. En xullo dese ano practicóuselle ao denunciante unha punción lumbar no CHUO e a doutora indicoulle que pedise cita para o mes de setembro. Non obstante non se lle asignaría cita ata catro meses despois: o 16 de xaneiro de 2015.

O home reclamou un adianto, pero finalmente convocáronopara o 28 de xaneiro de 2015. O paciente dirixiuse entón ao hospital privado Quirón, de Madrid, onde se lle realizou un TAC e se lle prescribiu unha intervención de "derivación de hidrocefalia". En xaneiro de 2015 acudiu con estes resultados ao CHUO, pero neste centro non se lle fixaría data ningunha para a intervención cirúrxica.

Por este motivo o home decidiu someterse a unha operación no Hospital Quirón, o 11 de febreiro de 2015. A raíz desta operación xurdirían complicacións que lle obrigarían a unha segunda operación no hospital madrileño en marzo de 2015, despois de que no CHUO se lle solicitasen máis probas.

A sentenza considera que "é lóxico que nesta tesitura o paciente se angustiase e acudise á sanidade privada". Para o maxistrado, "a Administración pública sanitaria funcionou de xeito deficiente e mesmo irracional".

ATRASO "NON TOLERABLE NIN XUSTIFICABLE"

O texto considera que o atraso para avaliar a proba da punción lumbar "non era tolerable nin xustificable", e que o denunciante non tiña "o deber xurídico de soportalo".

Non obstante, insiste en que a responsabilidade da Administración "non se deriva dunha mala praxe dos médicos do SERGAS" que atenderon ao paciente, senón "dun deficiente funcionamento do Servizo de neuroloxía do CHUO" en relación ás listas de espera.

INDEMNIZACIÓN PARCIAL

A sentenza xustifica o recorte da indemnización inicial solicitada (17.030,01 euros) en que tras o diagnóstico realizado polo hospital madrileño en 2015 o paciente "debeu solicitar formalmente unha intervención" na sanidade pública e non o fixo.

Tamén considera que respecto á segunda intervención realizada en Madrid non se demostrou que o SERGAS incorrera en "mala praxe" ao pedir probas ao paciente para comprobar os seus síntomas "o que non impide que uns días máis tarde, co agravamento da doenza post operatoria, procedese xa realizarlle sen dúbida a segunda intervención".    (Galicia Confidencial, 25/11/16)