O PP sabe, ou intúe, que se están estreitando a súa base social, a súa credibilidade e a súa lexitimidade... A Rueda resúltalle difícil enunciar logro algún do seu goberno. Non é raro. Pero é algo máis: mentres Galicia se fai máis plural, o PP faise máis fusco e agresivo... En fin. Talvez o PP perda. Talvez. Así que comeza a lama. Hai que evitar esa posibilidade... Nos próximos días pode que Ana Pontón se vexa acusada -sexamos imaxinativos- de subir a un iate con Amancio Ortega, un dicir, ou de impoñerlle o galego á súa propia filla... E Marta Lois, Marta Lois... xa se nos ocorrerá algo (Antón Baamonde)

 "Non parece moi estético que Rueda estivera na Feira do Cocido en Lalín xusto cando en Santiago tiña lugar unha manifestación contra o deterioro da sanidade pública. Tiña tanta présa polo cocido? Ou ben, non debería estar preparando o debate do día seguinte? Todos podemos entender o amor polo lacón con grelos pero, tiña que ser ese día?

Pero o PP é así. Ten estas cousas de arrogancia implícita. Que, por outra banda, remiten a unha lóxica de fondo. Por que motivo decidiu o PP convocar as eleccións xusto no Entroido, entre grelos e filloas? Para que fosen un trámite e pasaran todo o desapercibidas posible.

O PP sabe, ou intúe, que se están estreitando a súa base social, a súa credibilidade e a súa lexitimidade. Este dato dunha enquisa preocúpalles: “a modalidade de Goberno preferida entre a poboación xeral é unha coalición entre o BNG, o PSdG e outras forzas de esquerdas (41,6%), seguida dun executivo do PP en solitario (30,7%)”.

A Rueda resúltalle difícil enunciar logro algún do seu goberno. Non é raro. Pero é algo máis: mentres Galicia se fai máis plural, o PP faise máis fusco e agresivo. Máis amigo da bronca, máis Abascal. Pode parecer unha anécdota, pero o vello Baltar ía a todos os enterros da provincia: practicaba unha paisanaxe activa (que será das redes dos Baltar?). Os novos líderes e conselleiros do PP son unha xeración de autómatas sen xeito nin gracia. Aparte de que ninguén os coñece nin sabe se fan algo.

Así que se trataba de non chamar a atención. Menos, claro, Feijóo no papel de Makinavaja sacando a faca hiperbólica en todas as esquinas.

Fora coma fora, veu o CIS e veu o debate. La Voz de Galicia titulou despois da hecatombe de Rueda “Mucha política y poca sociedad”, como forma de descalificar o debate. Un comentarista afirmaba que os debates non cambian o voto contra a evidencia empírica. Outro, que dúas semanas nunha campaña son todo un mundo. Había que salvar ao soldado Rueda. Por certo, o periódico coruñés non fixo a súa usual enquisa acerca de quan gañara o debate.

En fin. Talvez o PP perda. Talvez.

Así que comeza a lama. Hai que evitar esa posibilidade.

Abstéñome de lembrar as baixezas da campaña de 2009. Pero vostede, lector, consulte a hemeroteca ou faga memoria, please!.

Nos próximos días pode que Ana Pontón se vexa acusada -sexamos imaxinativos- de subir a un iate con Amancio Ortega, un dicir, ou de impoñerlle o galego á súa propia filla. No caso de Besteiro podería optarse pola modalidade do luxo asiático atribuído a Touriño: seguro que comprou un coche eléctrico ou un sofá Philip Stark. E Marta Lois, Marta Lois... xa se nos ocorrerá algo."                 (Antón Baamonde , eldiario.es, 08/02/24)