"Unhas 80.000 persoas chegadas de toda a Galiza, segundo a organización, marcharon polas rúas de Santiago de Compostela este domingo convocadas pola Plataforma Ulloa Viva, a Plataforma en Defensa da Ría de Arousa (PDRA) e a Plataforma Veciñal contra a Mina de Touro-O Pino para manifestar o seu 'non' definitivo a Altri e mais á mina de cobre. "É un éxito absoluto após 19 meses de mobilizacións", sentenciaron.
Na cabeceira da manifestación, pouco antes do mediodía, na entrada á Alameda compostelá, voceiras das tres plataformas demandaron o "feche definitivo" por parte da Xunta da Galiza da tramitación dos seus dous "proxectos estratéxicos", Altri e a reapertura da mina de Touro-O Pino. A marcha contou co apoio de BNG, PSOE e Sumar Galicia, que participaron na mobilización coa presenza de Ana Pontón, voceira nacionalista; Lara Méndez, viceportavoz segunda do PSdeG, e Paulo Carlos López, secretario xeral de Sumar Galicia, entre outras autoridades.
A Xunta, responsábel
A portavoz da Plataforma Ulloa Viva, Marta Gontá destacou en declaracións aos medios que "volvemos a Santiago coa mesma determinación e co mesmo obxectivo que o fixemos o ano pasado: que Altri non se instale na nosa terra".
Segundo explicou Gontá, os motivos da protesta "son sinxelos e de sentido común". Afirmou que "queremos manter a calidade de vida que temos" e criticou que Altri-Smarttia (propietaria de 95% de Greenalia) "o que nos ofrecen son 8.754 quilos de gases contaminantes ao día que enfermarían a poboación". A voceira de Ulloa Viva lembrou que hai informes do Consello da Cultura Galega que así o avalan e recordou que a macrocelulosa suporía tamén "a contaminación do Ulla cunha vertedura de 60 toneladas de sulfatos ao día, expropiación da terra e regalarlle inxentes cantidades de auga doce e de terra fértil para que está industria poda arrancar as raíces dos nosos montes a demanda mentres un deserto verde de monocultivo nos arrasa".
Gontá advertiu que "queren sacarlle os bens e recursos aos nosos fillos para entregarllos a unha empresa privada que só busca beneficios a conta do que faga falta". Así, a voceira de Ulloa Viva deixou claro que "Altri non se vai instalar na nosa terra, defenderémola ao prezo que sexa" e advertiu que "os responsábeis do sufrimento da poboación e da escala que tome este conflito están na Xunta da Galiza". Neste sentido, engadiu que tanto o presidente Alfonso Rueda, como as conselleiras María Jesús Lourenzá e Ángeles Vázquez "son responsábeis do noso sufrimento e non están cumprindo coa súa obriga de mirar polos intereses da cidadanía" polo que os instou a "deixar o posto a outros membros do PP que sexan capaces de facelo".
"Altri non se vai instalar na nosa terra, defenderémola ao prezo que sexa" e advertiu que "os responsábeis do sufrimento da poboación e da escala que tome este conflito están na Xunta da Galiza". Neste sentido, engadiu que tanto o presidente Alfonso Rueda, como as conselleiras María Jesús Lourenzá e Ángeles Vázquez "son responsábeis do noso sufrimento e non están cumprindo coa súa obriga de mirar polos intereses da cidadanía" polo que os instou a "deixar o posto a outros membros do PP que sexan capaces de facelo".
Presión até botalos "ao lixo"
O presidente da Plataforma en Defensa da Ría de Arousa, Xaquín Rubido, destacou desde a Alameda de Compostela o "novo éxito" da convocatoria e apostou pola importancia de "seguir tecendo redes entre os movementos sociais para conseguir unha tensión mobilizadora e transversal do conxunto da sociedade galega para opoñernos a este intento por parte da Xunta de impoñernos un modelo produtivo que non queremos".
Rubido sinalou que o modelo que a Xunta está implantando no país "esnaquiza o noso tecido socioeconómico, tanto o agrogandeiro como o do mar, e tamén afecta seriamente o turismo", como no caso do Camiño de Santiago. "Estamos nun momento crucial", advertiu o presidente da PDRA, un momento no que "a aposta de Altri e da Xunta é esperar un cambio de goberno no Estado español para obter as axudas que até o de agora non foron quen de conseguir". E lembrou que, "como o proxecto de Altri naceu da man de Feixoo, Altri e Xunta queren recuperar os apoios dun goberno da man de Feixoo e de Vox".
"Neste novo escenario a Xunta da Galiza encabezada por Rueda opta por poñerse en segundo plano e aparentar que non teñen nada que ver co proxecto, que depende da empresa", destacou Rubido. O presidente da PDRA alertou de que "na realidade seguen coa mesma liña de actuación, van alegar á planificación eléctrica e van estar botando unha man a Altri en todo o que precise como fixeron até agora", polo que alertou, "non podemos fiarnos, temos que seguir facendo presión hai que manter a mobilización até conseguir que Altri e a Mina de Touro-O Pino estean nun caixón, no lixo".
A vida das persoas no centro
Pola súa parte Che Cancelo, voceira da Plataforma Veciñal contra a Mina de Touro-O Pino, dixo aos medios que "o río Ulla é a arteria máis importante do corazón da Galiza, unha arteria fundamental para os nosos sectores produtivos da terra e do mar".
Cancelo chamou a pór no centro "a vida das persoas", a diferenza do Goberno de Rueda, "que pon no centro os intereses de empresas depredadoras e contaminantes". Neste sentido lembrou que o Goberno da Xunta "dá subvencións a empresas con DIA negativa e que aínda non teñen a autorización ambiental como Cobre San Rafael, e eu non sei se iso será legal", dixo.
Se nestes momentos nin Altri nin a Mina de Touro-O Pino están funcionando, concluí, "é grazas a todas as veciñas e a toda a cidadanía da Galiza que sae á rúa a dicir que non queremos ser terra de sacrificio". "Necesitamos o Ulla, necesitamos a ría, e non imos parar até conseguilo".
Un bosque autóctono no Obradoiro
Máis dun cento de persoas con paraugas decorados con follas e ramallos de carballos e castiñeiros formaron no centro da praza do Obradoiro "un monte galego de especies autóctonas". Mentres, no escenario, Xurxo Souto deu a benvida ás persoas manifestantes que corearon consignas e cantaron, canda a Sés e Sabela Galbán "Tempestades de sal", todo un himno que selaron as regueifeiras de Vila de Cruces.
Na lectura do manifesto participaron mulleres das tres plataformas convocantes. Azucena Souto, veciña de Palas de Rei; María Porto, presidenta da Agrupación de Mariscadoras a Pé de Carril, e Olalla Barral, pola Plataforma Veciñal contra a Mina de Touro-O Pino. "As persoas que aquí estamos seguimos a crer que desde a Ulloa até a ría, terra, auga e aire son vida! Por iso exiximos que teñen que arquivar de inmediato e rexeitar o proxecto de Altri, que é unha industria de enclave e que atenta directamente aos nosos intereses como pobo".
"Dicímoslle si ás chousas, aos soutos, ás fragas, aos magostos, ás ameixas, aos mexillóns, á lamprea, ao salmón. Dicímoslle si a seguir dignificando o noso modo de vida, o agro, a gandaría, o marisqueo, as bateas, o turismo do Camiño de Santiago, a nosa riqueza ecolóxica, a nosa paisaxe e o noso territorio. Queremos a vida que estamos construíndo, pola que traballamos e loitamos cada día. Non imos deixar que outros nos digan o que é bo para nós. Esixímoslles o respecto que merecemos como persoas e como comunidade. Esixímosllelo".
E dirixíndose á Xunta da Galiza afirmaron que "sabemos que os responsábeis últimos das políticas industriais neste país son vostedes". Reafirmaron que nin a auga nin o territorio nin á saúde están en venda. "Fronte á avaricia dunha empresa extractivista que pretende arrasar a nosa vida, queremos deixar claro que Galiza non é terra de sacrificio: é fogar, é memoria, é futuro e un territorio harmónico". "Escóitennos ben: non o imos permitir! Non se pode arrancar a dignidade dun pobo vivo!". E remataron, "polas que somos e polas que virán, Altri non. Fóra xa!"." (Nós, 14/12/25)
No hay comentarios:
Publicar un comentario