1.000 millóns de euros por NGB, unha entidade que posúe perto do 50 por cento do aforro galego, é unha ganga

"Consúmase o espolio. 1.000 millóns de euros por NGB, unha entidade que posúe perto do 50 por cento do aforro galego, é unha ganga. Estamos a falar do instrumento financeiro que controla a maior concentración de capital amoreada nunca no noso país. 

Era unha entidade semi-pública, non privada, antes de PP e PSOE pactaren a súa privatización, en Madrid. Agora ten dono. Venezolano.

 Esta é unha noticia terríbel, mais non é unha noticia aillada. Un fundo de investimento británico-estadounidense mercou R. Un banco español (o Popular) mercou o Banco Pastor. Pemex (México) mercou Barreras. Damm (Catalunya) mercou Pescanova. Banesco (Venezuela) merca NGB.

A colonización do noso tecido empresarial é verdadeiramente impresionante. Non ten precedentes na nosa historia.

Está Feijóo preocupado? (...)"             (Xosé Mexuto, Sermos Galiza, 18/12/2013)

"Novagalicia Banco será vendida ao maior banco privado de Venezuela. O grupo financeiro Banesco será finalmente o adxudicatario da entidade financeira galega por uns 1.000 millóns de euros. (...)

Mil millóns para Banesco, 9 mil para @s contribuíntes

O prezo que finalmente NGB suporá para o grupo venezolano contrasta co custe que o saneamento da entidade financeira tivo para @s contribuíntes. Neste senso, o Goberno español inxectou 9.000 millóns de euros públicos ao banco resultante da fusión das extintas caixas dos cales, só recuperará mil. Os restantes 8 mil millóns pasarán a engordar o défice público."         (Semos Galiza, 18/12/2013)