"Antón Beiras Cal, auditor, economista e avogado, é o autor do A FONDO
sobre o novo hospital que publicamos co Sermos Galiza 181, xa dispoñíbel na loxa. (...)
Como xurdiu o proxecto do hospital de Vigo?
O Hospital Álvaro Cunqueiro nace para dar servizo a unha área de
referencia no sur de Pontevedr, infradotada para dar cobertura sanitaria
a unha poboación de medio millón de persoas.
Por que defende que o novo hospital de Vigo é privado?
Porque é propiedade da sociedade concesionaria, que o explota durante
un prazo de 20 anos arrendándoo mediante un canon anual ao Sergas. O
hospital está no balance da concesionaria e está fóra das contas
públicas da Xunta.
Con que obxectivo a Xunta de Galiza optou por un modelo privado?
Co duplo obxectivo de experimentar un modelo novo no noso país (aínda
que xa caduco en Inglaterra) de colaboración público privada e tamén de
que o seu financiamento non contase como déficit público.
Era ese modelo privado o máis barato para a cidadanía?
Non, é moito máis caro: uns 217 millóns de euros.
Que se fixo ben e que se fixo mal na licitación?
Na licitación non houbo transparencia nin libre concorrencia. Foi un
contrato amañado no que se favoreceu en diversos momentos o licitador.
Tamén alude no artigo a que non se cumpriron os requirimentos garantistas que recolle a Lei. Pode facerse iso?
De feito, fíxose. A concesionaria incumpriu o prazo construtivo e
amplióuselle. Foi incapaz de financiarse no mercado bancario e
axudóuselle co Banco Público Europeo de Investimentos.
Por que fala no artigo do "tufo a contubernio nepótico, a escuro chanchullo e a capitalismo de amiguetes"?
Precisamente por iso: porque ao suprimir dun contrato público desa
envergadura o principio de libre concorrencia, o que se produce é un
concerto entre a Administración concedente e o concesionario.
Poden adoptarse a día de hoxe medidas para corrixir a situación do hospital?
Non é fácil: a bicefalia público-privada só pode decapitarse mediante a rescisión do contrato e o rescate da concesión.
Como inflúe o dispendio do hospital de Vigo no futuro da sanidade pública galega?
Comprometendo gravemente as finanzas de xeracións futuras disfrazando de gasto corrente o que é un investimento.
Canto ía custar e canto custou ao final o hospital?
Ía custar 325.460.035 euros e eu calculo en euros correntes de 2014 un custo de case 550.000.000 euros.
Amais das responsabilidades políticas que reclama unha parte
importante da poboación, hai quen reclama responsabilidades xudiciais. É
posíbel que os responsábeis acaben nos tribunais?
Non o vexo así. No Estado español xudicializamos todo. Eu creo que a
opción por un hospital privado arrendado ao Sergas mediante unha
concesión é unha opción lexítima do goberno de Feijóo. En Inglaterra
construíronse mesmo cárceres con capital privado en concesión. Este
asunto é esencialmente un debate político non xudicial.
Como avogado da Asociación para a Defensa da Sanidade Pública
formulou unha denuncia á Comisión Europea contra a Xunta de Galiza por
posíbel vulneración do dereito comunitario na licitación da concesión do
Hospital. Pensa que prosperará?
Estou convencido de que si. De feito, cando a Comisión Europea (que é
moi parsimoniosa na admisión de denuncias) a admitiu a trámite e
acordou estudar o caso, fixándose o prazo dun ano para iso, é porque
aprecia graves defectos incompatíbeis coas directivas europeas relativas
a concesións públicas." (Entrevista a Antón Beira Cal, Sermos Galiza)
No hay comentarios:
Publicar un comentario