"Alejandro Martínez é un dos promotores da Sociedad Cooperativa Agraria Condado-Paradanta, unha cooperativa moi coñecida en toda esa comarca, e tamén en Galicia, polos famosos requeixos das Neves.
Pero o negocio non só é de requeixos. Tamén cultiva produtos
ecolóxicos, principalmente, froitos do bosque como amoras, amorodos
arandos ou arandos vermellos, e mel, moito mel. Iso era ata antes do 15
de outubro. O domingo negro dos lumes.
Ese día unha língua de lume que subíu como se fora
unha cheminea polo río Termes acabou co esforzo de anos. O incendio
arrasoulles un colmear con 45 colmeas.
Case 1.200 quilos dun mel co selo Mel de Galicia e que xa levara
medallas de prata e de bronce. Tamén lle queimou unha veiga na que había
sementados froitos do bosque e as lapas mesmo chegaron ás dependencias
da actual cooperativa, afectando seriamente unha das súas partes.
Pero o que máis lle doeu a Alejandro foi ver como as lapas tamén arrasaban un vello aserradeiro hidráulico do século XIX
que adquiriu hai un tempo para tentar facer del o centro de toda a súa
cooperativa. “Foi unha gran perda material, pero tamén sentimental
porque hai lembranzas de familia, de moita xente que traballou ahí”,
apunta a GC.
“Meu avó no 27 traballou aí con 12 anos, e aí colleu o
alcume familiar por parte de nai, os Pichóns”, di. “E iso?”, “porque
estaba nun castelo de madeira e derrubouse e el, que lle gustaban moito
os pichóns, dixo que voou como un pichón para salvarse. Desde entón
quedoulle o alcume”. Dentro de tanta tristura dá tempo para uns
sorrisos.
O sitio, ata a chegada do lume, era fermoso. Un
remanso de paz no medio dun paraíso verde que agora mudou a negro, gris e
triste. Ese proxecto que tiña para crear un gran centro de degustación
dos seus produtos; o requeixo das Neves, marmeladas artesáns e mel, é
hoxe un espellismo.
Un total de 400.000 euros de investimento que,
agora, terán que agardar, ata non saber cando. Tamén eses moteiros que
fan a ruta Vigo-Ourense pola antiga estrada terán que agardar a ver ese
proxecto rematado. Un centro que pretendía asociar turismo, gastronomía, paisaxe e produtos naturais e artesanais.
Pero Alejandro, a pesar de todo o perdido, da
tristeza e das centos de bágoas que fuxiron polo seu rostro estes días,
aínda ten esperanzas. “Sempre na cooperativa tentamos mirar para adiante
e fronte á maldade, resistencia”, asegura. Por iso, di, o máis
importante é continuar para adiante.
Agora están tentando facer un
reconto de danos, pero, afortunadamente, tiñan almacenado aínda mel,
requeixo e froitos para tentar continuar coa súa actividade, cando
menos, unha tempada. “Paramos a semana pasada pero esta xa volvemos surtir de produtos a negocios de Vigo, Santiago e mesmo de Inglaterra”, di mentres conduce a súa furgoneta para cumplir, precisamente, algún destes encargos.
Tampouco descarta pedir as axudas da Xunta.
“Nós
vamos pedilas. Eu son de familia labrega e, como dicían na casa; quen
non chora, non mama.... Pero mentres veñen non podemos agardar. Temos que seguir tirando para adiante”,
suliña. “Choramos o que tiñamos que chorar. Abrimos o negocio e
seguimos e choramos pero temos que tirar para adiante”, repite.
Os lumes
Sobre o que pasou o domingo negro é contundente. “Eu
teño 51 anos pero nunca coñecín un lume deste xeito... e xa temos
pasados lumes fortes. E neste ensináronme dispositivos moi sofisticados
que estaban postos no monte. Querían que a N-120, á altura de Covelo,
quedara cortada. Querían cortar as vías de comunicación, e a autopista
tamén, e deixarnos sós ante o lume”, sinala.
Tamén recoñece que os lumes superaron os dispositivos previstos. “Non pode haber medios para todos. Houbo maldade, e fronte a iso, hai que volver erguerse”, di. (...)" (Galicia Confidencial, 25/10/17)
(...) Durante un percorrido realizado con medios de
comunicación por algunhas das parroquias das Neves, o rexedor insistiu
en que o dano foi tal, que non só se produciron danos materiais, senón
que quedou "seriamente comprometida" a actividade socioeconómica e, por tanto, o futuro do pobo.
A ese respecto, puxo como exemplo a empresa Madeiras Viaria, cuxas instalacións (mercadoría, naves, maquinarias, etc.) quedaron completamente calcinadas, e que xeraba 25 empregos directos e outros 40 indirectos.
Os seus traballadores lamentaron que "non quedou nada, nada se puido
salvar" do negocio, e que a primeira motobomba de extinción chegou cando
xa as lapas estaban moi estendidas.
Ademais das empresas, das 2.000 vivendas que hai nas Neves, catro quedaron completamente destruídas, outras 26 sufriron graves danos e outro centenar resultaron afectadas
en menor medida, ao que se suman máis de 5.000 hectáreas de monte
arrasado. Segundo explicou Xosé Manuel Rodríguez, os técnicos do
Concello e os voluntarios solicitaron información de 850 incidencias
relacionadas con danos en vivendas, leiras, automóbiles, etc.
Ante este escenario, o rexedor advertiu de que, aínda
que o Concello está a facer fronte ás necesidades persoais máis
perentorias, é "imprescindible" que todas as administracións públicas
implíquense para pór en marcha un plan de recuperación integral. Na súa
opinión sería "inaceptable" que non asumisen ese compromiso, e esixiu a estas administracións "que non abandonen á xente". (...)
As Neves contará para este balance coa axuda
desinteresada da empresa madrileña Geotronics, especializada en
tecnoloxía de posicionamento de última xeración. Un dos seus
especialistas, o enxeñeiro Pablo Ruiz, que ten vínculos persoais co
pobo, xa empezou a rexistrar imaxes en 360 graos de todos os lugares
afectados polos incendios, grazas a unha cámara instalada no teito dun
vehículo.
Segundo explicou, a través deste sistema de 'mobile mapping' toda a información capturada será geolocalizada e permitirá medir de forma precisa as superficies queimadas.
Este innovador sistema permite 'rastrexar' o municipio en só un día e
medio, cando este tipo de medicións realizadas con outros mecanismos
"poden levar semanas ou mesmo meses". (...)" (Galicia Confidencial, 24/10/17)
"Os veciños autoorganízanse para recuperar o monte e a fauna tralos incendios.
"O mellor da xente".
Así describen veciños das Neves e Ponteareas a marea de solidariedade
que envolve a estes concellos, dos máis afectados pola vaga de lumes en
Galicia da pasada semana. Auga, roupa, alimentos...
As caixas amorénase para que os voluntarios autoorganizados repartan a
axuda prestada entre os veciños afectados.
Pero tamén se están facendo esforzos por recuperar a superficie queimada e alimentar os animais, que agora apenas atopan lugares onde pastar.
Veciños das Neves comentan a GC que eles mesmos puxeron en marcha "as primeiras medidas improvisadas para alimentar o gando e cabalos
que ficaron no monte". Os voluntarios foron deixando en distintos
puntos da contorna pan duro, mazás, herba, auga... para que os animais
poidan alimentarse e hidratarse.
Un deses lugares é o monte de Sandomedio,
na parroquia de Taboexa. Segundo o alcalde das Neves, Xose Manuel
Rodríguez Méndez, o 99% do concello resultou afectado polo lume. Alí
calcúlase que arderon unhas 6.000 hectáreas.
A metade da poboación da localidade, duns 4.000
habitantes, leva sen subministración de auga potable desde o martes,
cando as cinzas cubriron a canle do río Termes, o afluente do río Miño
que abastece o consumo do municipio. Por iso, está sendo fundamental a
repartición de auga embotellada que fan máis de 70 voluntarios entre os
damnificados.
Outro dos problemas que padeceron os veciños foi o
corte de electricidade tras arder varios paus eléctricos. A isto súmase a
denuncia que facía o propio alcalde das Neves contra Movistar —empres
que controla a rede telefónica— por non ter restablecido o servizo de
telefonía unha semana despois dos incendios.
De igual xeito, os veciños de Ponteareas tamén están organizándose para iniciar a recuperación de zonas como o monte de San Cibrao de Guláns, en Ponteareas,outra zona moi afectada polos incendios.
Alí, neste concello, veciños e comuneiros organizaron
unha asamblea-xuntanza aberta de reflexión colectiva e aproveitaron
tamén para espallar palla nas zonas calcinadas, fundamental para fixar a terra, que non se perda solo e favorecer a xerminación cando comecen os traballos de replantación.
Estas imaxes repítense por diversos concellos afectados pola onda de incendios da pasada semana. (...)" (Galicia Confidencial, 24/10/17)
No hay comentarios:
Publicar un comentario