"Lonxe de dar marcha atrás nos seus anceios mineiros, a Xunta segue
apoiando ao sector das minas en Galicia. E desta volta non só con
permisos ás grandes multinacionais, senón tamén con diñeiro para aquelas
asociacións que as apoien, como podería ser o caso de 'Corcoesto Si,
Mina, Si', favorable ao megaproxecto mineiro da multinacional canadiana
Edgewater en Cabana de Bergantiños.
O Goberno galego aprobou este xoves unha nova convocatoria de axudas
coas que se pretende apoiar a "entidades sen ánimo de lucro" que
traballan a favor do sector mineiro no desenvolvemento de proxectos
centrados no fomento, a planificación, a mellora tecnolóxica, a
protección ambiental, a seguridade e a saúde. E, en tempo de crise, este
tio de axudas favorables á minería dotada con 300.000 euros.
A través deste programa, que a Xunta insiste en que non beneficiará a
empresas pero "si a asociacións", apoiarase un 80 por cento do total do
investimento das iniciativas que se aproben. (...)
E estas axudas chegan cando, xustamente, a Comisión Europea comeza a
ollar con preocupación os proxectos mineiros de Galicia. Por iso, acaba
de reclamarlle información ás autoridades españolas en relación cos
requisitos que impón a lexislación ambiental da UE para a explotación da
mina galega de Corcoesto.
É a resposta da Comisión Europea a unha nova pregunta formulada polos
eurodeputados Antolín Sánchez Precedo, do PSOE, e Ana Miranda, do BNG,
en relación coa explotación mineira, da que informa o Parlamento
Europeo. Sánchez Presedo expuxo á Comisión que a resolución da Xunta de
Galicia pola que se sometía a información pública o proxecto, o estudo
do impacto ambiental e o plan de restauración para a concesión do mesmo,
non respectaba o regulamento comunitario.
Pola súa banda, Ana Miranda, pediu que se aclare se o procedemento
seguido para a explotación da mina de ouro de Corcoesto, na Coruña,
cumpre coa normativa europea. Tamén Francisco Eslamiada, de UPD,
preguntou á Comisión se considera o proxecto compatible coa Directiva de
Hábitats, o Marco de Augas e a Directiva sobre responsabilidade.
Denuncia de manipulación
Por outra banda, Salvemos Cabana presentou unha queixa ante o CPXG polo
veto informativo da TVG sobre a campaña contra a megaminaría en Galicia
#salvemosgalicia. Un vídeo que denuncia o proxecto de Corcoesto e que
nun só día superou as 75.000 visitas en Youtube, 67.000 firmas e foi
trending topic nas redes sociais. "Consideramos intolerable a censura
informativa que está a exercer a TVG sobre a campaña contra a minaría
contaminante en Galicia", denuncia.
Novas manifestacións
Estas críticas coinciden coa mobilización cidadá contra a macromina que se celebrará o 31 de maio cun concerto de, entre
outros, os grupos Zënzar, Nom, Quempallou, Ses e o Leo. Será con
entrada de balde ao carón da Estación Vella de Carballo." (Galicia Confidencial, 23/05/2013)
No hay comentarios:
Publicar un comentario