“Tienes que desaparecer de Santiago”

"F.M.F.C., que mantivo unha relación coa concelleira de Santiago Rebeca Domínguez, denuncia que dous policías o amenazaron para que se marchase da cidade, segundo figura nunha declaración presente nas dilixencias previas 5542/2013. Nestas dilixencias, o Xulgado Número 1 de Santiago imputou  a sete concelleiros de Compostela e por aprobar o pagamento da defensa do edil Adrián Varela para o caso Pokemon.

Na súa declaración nos xulgados, F.M.F.C. dá detalles sobre presuntas irregularidades nas contratacións de varias áreas do Concello de Santiago, da liorta interna do PPdeG ao fío do caso Pokemon e da vida privada dos concelleiros. Con todo, dende o punto de vista penal, o máis grave son as presuntas ameazas realizadas por dous individuos que se lle identificaron como policías.

F.M.F.C. relata que quedara con Domínguez para que lle devolvera un cargador de iPod tras romper a relación a finais de 2013. Á cita non acudiu a política, senón dúas persoas que lle pediron a documentación e identificáronse como policías. Posteriormente amenazárono con que debía “desparecer”   de Santiago para evitar “tener problemas”. 

Un dos presuntos policías identificouse cunha placa. Na  comparecencia xudicial, os funcionarios de Xustiza amosáronlle varios modelos de placas, e a testemuña declarou que o modelo que máis se parecía é o de Policía Local. A testemuña asegura que coñecía a unha desas persoas que o ameazaron de vista. 

Coñecíao dunha das reunións que celebraban concelleiros e destacados dirixentes do PP na casa de Domínguez e da tamén concelleira María Castelao, para coordinar a súa defensa nos casos derivados da Pokemon. Os presuntos policías tomaron nota da matrícula do coche da testemuña e negáronse a dar os seus nomes. 

Tras as ameazas, o médico de 33 anos F.M.F.C.  decidiu volver ao seu Portugal natal e poñer en coñecemento da Xustiza o sucedido. Na súa comparecencia nos xulgados en decembro, relatou ademais varias presuntas irregularidades na contratación pública do Concello de Santiago.

Por exemplo, sobre a súa imputación da súa ex-parella na Pokemon, F.M.F.C aseguroulle que Domínguez admitiulle ter cambiado algunha folla, pero descargou a responsabilidade desta acción noutras persoas, que lle terían colocado os documentos diante para asinar. Isto é coherente do que trascendeu da declaración da concelleira de Normalización nos xulgados.

 Domínguez está imputada na Pokemon por supostamente asinar o pago a Vendex dunhas facturas de xeito irregular. Segundo informou La Opinión, a moza declarou nos xulgados que o fixo por presións do alcalde Ángel Currrás.  

Currás e Domínguez, malia que forman do mesmo goberno, pertencen a dous bandos enfrotados a morte dentro do PP. De feito, a testemuña asegura que a concelleira lle contou que foi o propio Currás, a través dun militante do PP, quen promoveu a denuncia inicial pola que finalmente sete dos seus concelleiros foron imputados polo Xulgado Número 1 de Santiago.

F.M.F.C. tamén contou nos xulgados que a cadea Leroy Merlin realizou regalos e festas tanto para Domínguez como para a súa compañeira María Castelao, concelleira de Servizos Sociais. 

A testemuña asegura que Castelao lle pasou a Domínguez varios orzamentos para as festas infantís do Nadal e que as propostas eran descartadas ou tidas en conta en función de se a súa ex-moza coñecía ou non aos empresarios ofertantes. Por último, asegura que a súa ex-moza tamén se ofreceu a quitarlle multas municipais. 

Sobre a imputación dos sete concelleiros de Santiago por aprobar pagarlle a defensa na Pokemon ao concelleiro de Deportes Adrián Varela, F.M.F.C dá numerosos detalles sobre reunións entre destacados dirixentes do PP galego cun dos bandos dos conservadores santiagueses. GC informará sobre estas reunións nos vindeiros días. 

A testemuña tamén contou a Xustiza algúns datos sobre a vida sentimental de varios membros do Goberno de Santiago. GC non publicará esta información porque, malia que axuda a entender a guerra civil dos conservadores santiagueses, considera que eses datos pertencen á esfera exclusivamente privada.

Para dar credibilidade a súa versión, F.M.F.C. aportou ao xulgado fotos, sms, whatsapp e correos electrónicos que proban que efectivamente mantivo unha relación con Domínguez. 

GC ofreceu a Domínguez, Castelao e ao Concello de Santiago dar a súa versión sobre os feitos relatados pola testemuña presuntamente ameazada polo Policía, pero este medio só obtivo resposta polo de agora de fontes próximas a Domínguez. 

Estas fontes argumentan que todo se trata dunha reacción propia dun momento no que rompe unha relación e negan todas as acusacións lanzadas por F.M.F.C contra Rebeca Domínguez, que prefire non rebater polo miúdo tales acusacións. (...)"           (Galicia Confidencial, 23/03/2014)