"Os datos de desemprego volven traer malas novas para Galicia, terceira
comunidade autónoma onde máis se incrementa o paro rexistrado en xaneiro
ao aumentar en 7.639 persoas con respecto ao mes anterior.
O número de
parados inscritos nas oficinas de emprego queda así en 236.447, logo
desta suba relativa do 3,34%, tamén a terceira maior e superior á media
estatal (+1,4%).
Galicia volve situarse no podio do paro no Estado logo de liderar o incremento do desemprego en decembro e despois de que as cifras da EPA alertasen do estancamento na caída do paro
e da constante perda do diferencial positivo coa media de España. En
termos interanuais os datos melloran ao reducirse o desemprego en 22.555
persoas con respecto a hai doce meses, pero é o quinto mes consecutivo
de incremento.
En Galicia, o desemprego sobe en todas as provincias e céntrase fundamentalmente no sector servizos.
Así, o 96% do incremento do paro rexistrado dáse neste sector: son 7.336
persoas que ingresaron nas listas das oficinas de emprego fronte ao
7.639 total, un dato que revela a masiva finalización dos contratos pola
campaña de Nadal. Pola contra, o número de parados descende en 8
persoas na agricultura e en 317 na industria e increméntase na
construción (544) e tamén no colectivo sen emprego anterior (84). (...)
Non obstante, os datos son aínda peores en canto ao emprego. Segundo os datos do Ministerio, Galicia rexistrou no pasado mes de xaneiro 15.240 afiliados menos á Seguridade Social con respecto ao mes anterior.
Unha destrución de máis de 15.000 empregos fronte ao aumento interanual
de cotizantes de 17.554, quedando a media de cotizantes en 930.883
persoas.
Nun só mes, Galicia destruíu o 86,8% dos empregos creados no
último ano e o 77,6% dos que creara en todo 2015, cando o número de
cotizantes aumentara en 19.641 persoas.
En definitiva, máis de 17.500 persoas pasaron a contribuír ás arcas
públicas por medio do seu traballo no último ano, fronte ás máis de
22.500 que deixaron as listas de desemprego. Esta diferenza de máis
5.000 persoas entre a redución do paro e a alta de traballadores é
debido a varias circunstancias, como a emigración e fuxida da poboación
activa, o desánimo que leva a desapuntarse das listaxes de demandantes
de emprego ou o paso á economía en b. Polo tanto, non todo o descenso do
paro rexistrado equivale a novos postos de traballo. (...)" (Praza Pública, 02/02/16)
No hay comentarios:
Publicar un comentario