"A Xunta destina un millón de euros a grandes
xornais para visualizar que en Galicia "as persoas maiores teñen dereito
a facerse maiores como elas libremente desexen", mentres que existe
unha lista de espera importante para atopar prazas en residencia.
A Consellería de Política Social ten aberto un
concurso de publicidade para vender nos grandes medios de comunicación
as súas políticas no ámbito da terceira idade. Un concurso que custa un millón de euros que serán repartidos entre os grandes xornais, cando en Galicia existen importantes listas de espera para entrar, precisamente, nunha residencia da terceira idade.
Unha
de cada catro persoas que viven en Galicia son maiores de 65 anos.
Deles, hai preto de 60.000 persoas que reciben algunha prestación da lei
de dependencia. E hai outras dez mil que teñen ese dereito, pero non
contan con ningunha axuda. Entre elas, unhas 1.600 agardan por unha
praza nunha residencia pública. De feito, e tendo en conta o custe medio
dunha destas prazas --segundo a Xunta sobre 500 euros--, o Goberno
galego podería custear 2.000 novas prazas durante un mes co diñeiro que
destina a esta campaña publicitaria.
Tamén se podería destinala aos Bonos Autonomía en Residencia,
unha medida ao estilo Bono Concilia para as escolas infantís, que a
Xunta puxo en marcha para permitir aos maiores contar cunha prestación
económica para sufragar un centro privado mentres esperan pola
residencia pública. A axuda é de 490 euros ao mes. Polo que, tamén se poderían poñer en marcha 2.000 novos bonos co diñeiro que se destinan a pagar aos grandes medios de comunicación.
AS "OPORTUNIDADES" DOS MAIORES
"O volume de poboación maior que ten a nosa comunidade non debe ser visto como un problema,
senón como unha oportunidade de aprender da súa experiencia e mellorar o
noso sistema de benestar", apunta a Consellería de Política Social na
posta en marcha desta nova campaña publicitaria. Para este departamento,
unha persoa maior "non é un suxeito pasivo", senón un "suxeito activo,
que ten o dereito de escoller como e onde desexa ser atendido". "Por iso
o Goberno galego está a traballar para ofrecer sevizos de calidade, en
cantidade suficiente e con tanta variedade como reclaman os nosos
maiores", indica.
Por iso, con esta campaña publicitaria, a Xunta quere "vender" o seu "amplo catálogo de recursos,
de diferentes tipoloxías e adapatados ás circunstancias concretas de
cada persoa maior". Entre estes recursos que quere publicitar está o
xantar na casa, a teleasistencia avanzada, o Servizo de Axuda no Fogar,
máis prazas públicas de residencia e de centro de día, as novas casas do
maior ou as prestacións económicas para axudar ás persoas a financiar o
servizo que eles desexen.
O obxectivo da campaña, segundo Política
Social, "debe ser visualizar que en Galicia as persoas maiores teñen
dereito a facerse maiores como elas libremente desexen". "Cada unha e
cada un deles presentan unha situación, unhas necesidades e unhas
preferencias diferentes, que cómpre atender e ter en conta", engade o
documento.
O total da campaña será un millón de euros a
repartir en dúas anualidades, 2019 e 2020 con campañas de publicidade en
televisión, prensa xeralista, prensa especializada, radio e edicións
dixitais de medios." (Galicia Confidencial, 14/07/19)
No hay comentarios:
Publicar un comentario