‘MerCamariñas', unha central de venta online para o comercio local

 "Interesante proxecto do Concello de Camariñas para axudar ao comercio local a sumerxirse na rede. Lanzará proximamente ‘MerCamariñas’, unha central de venta online para os establecementos do municipio que nace co obxectivo de adaptalos ao comercio electrónico para que poidan vender os seus produtos a través de Internet.

Adherirse a esta campaña é totalmente gratuíto e aqueles negocios que o fagan contarán cun espazo propio da súa tenda dentro da web para poder así vender e xestionar os seus produtos.

O portal estará xestionado tecnicamente pola empresa local WP Nordés e os comerciantes só se terán que encargar dos produtos que poñan á venta e de promocionar o seu espazo virtual a través das redes sociais."           (Que Pasa na Costa, 20/02/21)

"Cos pés na Terra e os produtos na nube" ou como apoiar o comercio local comprando online

"Este venres celébrase o Black Friday, a famosa tradición estadounidense que dende hai uns anos está a coller forza no noso país. Moitas grandes empresas aproveitan este día, ou incluso toda a semana, para ofrecer descontos que deixan fora de órbita ao comercio local.

 Mais ante os grandes magnates coma Amazon ou AliExpress, a axencia Arela Comunicación Sostible trae "Cos pés na Terra e os produtos na nube",  unha listaxe con máis de 100 ecommerce galegos coa que pretenden darlle visibilidade a eses pequenos e medianos comercios "que crean postos de traballo e contribúen ao futuro de pequenas vilas e pobos", tal e como apuntan dende Arela.

Galicia conta con unha unha gran rede de alternativas locais, con moi boas ideas e con produtos de gran calidade, cousa que se pode comprobar nesta listaxe con tendas encadradas en múltiples seccións: dende decoración e agasallos, ata beleza ou moda. Na web podemos atopar máis dun centenar de ecommerce de distintos puntos da xeografía galega e onde, por suposto, a Costa da Morte tamén está presente. 

Polo de agora Origen Galicia (Carballo), Esencia Atlántica (Muxía), Mimadriña (Fisterra), Nacho Porto (Carnota), O Falsete (Malpica), Todo Lar (Carballo) e Aralumen (Fisterra) son as tendas costeiras que se amosan na listaxe, mais esta continúa en actualización. Dende Arela, animan á xente a que fagan aportacións con outras tendas galegas online que coñezan e así facela máis grande.

Esta inicitativa pretende facilitar a labor a todos aqueles consumidores que desexen comprar produtos galegos, sobre todo agora que se aproximan as compras de Nadal e Reis, facilitándolles un contacto directo con distintas empresas cunha gran variedade de produtos de máxima calidade, e axudando tamén á inversa, xa que "mercar nas tendas en liña galegas e recomendar os seus produtos, tamén é defender o comercio local", indican dende a axencia de comunicación.  

Por outro lado, na web de Arela tamén aportan outro gran de area ás pequenas empresas online cun post no que amosan varios puntos sobre os que deberían traballar para potenciar as súas tendas e tirarlle máis proveito económico a estas datas, onde se concentran as campañas máis importantes do ano."                       (Paula Castiñel, Qué pasa na costa, 26/11/19)

Cada dous días fechan na Galicia cinco comercios de barrio

"Foron máis de 3.500 nos últimos catro anos, segundo datos do propio sector, que incide no impacto dos grandes centros comerciais e a venda ‘on-line’.

Sen un tecido comercial vivo non hai cidades nin vilas vivas. É unha máxima que repiten con teimosía desde entidades e asociacións de comerciantes. Os últimos dados que manexa o sector semellan apontar, seguindo esta máxima, a cidades e vilas con menos ‘vida.’.

Nos últimos catro anos fecharon na Galiza 3.587 tendas ou comercios de proximidade. Son dados de Uatae, a Asociación de Traballadoras e Traballadores Autónomos e Emprendedores, nada en 2003 e que une a máis de 300 entidades deste sector, representando máis de 350.000 profesionais. Eses 3.587 comercios no último cuadrienio supoñen que fechan máis de 2 cada día no noso país. Son, para ser exactos, cinco comercios de barrio menos cada dous días.

As cifras absolutas rexistradas na Galiza son as segundas peores de todo o Estado neste período. Só en Catalunya botaron o feche máis comercios nestes catro anos (7.320). En termos relativos, perdemos 6,7% deses comercios, porcentaxe só superada por Castela-León, Aragón, Euskadi, Asturies.

Os motivos? Desde Uatae apontan factores como a queda de vendas no pequeno comercio fronte ás grandes superficies e corporacións, así como polo aumento constante da venda on-line. “A vida dos barrios e das cidades deteriórase cos locais comerciais fechados”, lamentan."                (Sermos Galiza, 17/09/19)